.jpg)
ஒக்டோபர் மாதத்திற்கான எரிபொருள் விலை திருத்தம் தொடர்பான புதிய அறிவிப்பு இன்று (30) இரவு வெளியிடப்படும் என எரிசக்தி அமைச்சர் அனுர கருணாதிலக்க தெரிவித்துள்ளார்.
இன்று நடைபெற்ற ஊடகவியலாளர் சந்திப்பில் கருத்து தெரிவித்த அமைச்சர், எரிபொருள் விலை திருத்தம் பொதுவாக ஒவ்வொரு மாதத்தின் இறுதி நாளிலும் மேற்கொள்ளப்படுவதாக குறிப்பிட்டார்.
அதன்படி, ஒக்டோபர் மாதத்திற்கான புதிய எரிபொருள் விலைகள் தொடர்பான அறிவிப்பு இன்று இரவு வெளியிடப்படும் என அவர் தெரிவித்தார்.
இதனிடையே, எதிர்வரும் விலை திருத்தத்தின் ஒரு பகுதியாக டீசலுக்கு லீற்றர் ஒன்றுக்கு 70 ரூபாய் மானியம் வழங்க அரசாங்கம் திட்டமிட்டுள்ளதாகவும் அமைச்சர் கூறினார்.
உலக சந்தையில் எரிபொருளின் விலை அதிகரித்துள்ள நிலையில், இலங்கையில் எரிபொருள் விநியோகத்தில் ஈடுபட்டுள்ள நிறுவனங்கள் எதிர்கொள்ளும் நட்டம் தொடர்பில் அரசாங்கத்துக்கு அறிவித்துள்ளதாகவும் அவர் தெரிவித்தார்.
நிறுவனங்கள் வழங்கிய தகவல்களின் அடிப்படையில், டீசல் விற்பனையில் ஏற்படும் நட்டம் நிறுவனத்திற்கு நிறுவனம் மாறுபடுவதுடன், லீற்றர் ஒன்றுக்கு சுமார் 120 ரூபாய் முதல் 247 ரூபாய் வரை நட்டம் ஏற்படுவதாக தெரிவிக்கப்பட்டுள்ளது.
இந்நிலையில், டீசலுக்கு அரசாங்கம் வழங்கும் மானியத்தால் இலங்கை பெற்றோலியக் கூட்டுத்தாபனம் (CPC) குறிப்பிடத்தக்க நிதிச் சுமையை எதிர்கொண்டு வருவதாக அமைச்சர் குறிப்பிட்டார்.
எவ்வாறாயினும், இந்த ஆண்டு இறுதிக்குள் CPC நட்டமின்றி செயல்படும் வகையில் தேவையான நடவடிக்கைகள் மேற்கொள்ளப்பட்டு வருவதாகவும் அவர் தெரிவித்தார்.
மேலும், டீசலுக்கு வழங்கப்படும் மானியம் பெட்ரோலுக்கு வழங்கப்படாது எனவும் எரிசக்தி அமைச்சர் அனுர கருணாதிலக்க தெரிவித்துள்ளார்.
பொது அறிவு வினாடி வினா
உங்கள் அறிவை சோதித்துப் பாருங்கள்!
