இலங்கையில் தெருநாய்களுக்கு Microchip பொருத்தும் திட்டம் ஆரம்பம்

இலங்கையில் தெருநாய்களின் விபரங்களைச் சேகரித்து முறையாகப் பேணும் நோக்கில், ஹோமாகம பிரதேச சபையின் ஊடாக அவற்றுக்கு மைக்ரோ சிப் (Microchip) பொருத்தும் திட்டம் ஆரம்பிக்கப்பட்டுள்ளது.
இந்தத் திட்டத்தின் மூலம் தெருநாய்களின் தடுப்பூசி விபரங்கள், சுகாதார நிலை மற்றும் அவை காணப்படும் இடம் உள்ளிட்ட தகவல்களை அதிகாரிகள் அறிந்துகொள்ள முடியும் எனத் தெரிவிக்கப்படுகிறது.
குறிப்பாக, தெருநாய் கடிக்கும் சம்பவங்கள் இடம்பெறும் சந்தர்ப்பங்களில் அல்லது ஏனைய தேவைகளுக்காகக் குறித்த நாயின் விபரங்களை அடையாளம் காண்பதற்கும் இந்த முறைமை உதவும் என எதிர்பார்க்கப்படுகிறது.
இலங்கையின் பல பகுதிகளில் உரிமையாளர்களற்ற தெருநாய்கள் அதிகளவில் காணப்படுகின்றன. அவை தொடர்பான துல்லியமான தரவுகளையும் புள்ளிவிபரங்களையும் சேகரிப்பதில் பல்வேறு சவால்கள் நிலவுகின்றன.
இந்நிலையில், சுற்றுலாப் பயணிகளின் முக்கிய நகரமான காலியிலும் தெருநாய்களின் நடமாட்டம் பிரச்சினையாக உருவெடுத்துள்ளதாகச் சுட்டிக்காட்டப்படுகிறது.
இந்தப் பின்னணியில், ஹோமாகம பிரதேச சபையின் தலையீட்டில் முன்னெடுக்கப்படும் மைக்ரோ சிப் திட்டம், தெருநாய்களின் விபரங்களை முறையாகப் பதிவு செய்து கண்காணிப்பதற்கான நடவடிக்கையாக அமைந்துள்ளது.
இதேவேளை, ரேபிஸ் நோயைக் கட்டுப்படுத்தும் நோக்கில் நாய்களுக்குத் தடுப்பூசி செலுத்தி அவற்றைப் பதிவு செய்யும் வேலைத்திட்டம் அண்மையில் ஹட்டன் – டிக்கோயா நகர சபை மண்டபத்திலும் முன்னெடுக்கப்பட்டிருந்தமை குறிப்பிடத்தக்கது.
பொது அறிவு வினாடி வினா
உங்கள் அறிவை சோதித்துப் பாருங்கள்!