இயக்குநர் இமயம் பாரதிராஜா காலமானார் – தமிழ் திரையுலகம் சோகத்தில்

தமிழ் திரையுலகின் முன்னணி இயக்குநரும், ‘இயக்குநர் இமயம்’ எனப் போற்றப்பட்டவருமான பாரதிராஜா இன்று (10) காலமானார். அவருக்கு வயது 84.

அண்மைக்காலமாக உடல்நலக்குறைவால் பாதிக்கப்பட்டிருந்த பாரதிராஜா, சென்னையில் சிகிச்சை பெற்று வந்த நிலையில் இன்று அதிகாலை உயிரிழந்ததாக தகவல்கள் தெரிவிக்கின்றன.

1977ஆம் ஆண்டு வெளியான ‘16 வயதினிலே’ திரைப்படத்தின் மூலம் இயக்குநராக அறிமுகமான பாரதிராஜா, தமிழ் சினிமாவில் புதிய மாற்றத்தை ஏற்படுத்தியவர் எனக் கருதப்படுகிறார். கிராமிய வாழ்க்கை, மனித உணர்வுகள் மற்றும் யதார்த்தமான கதையம்சங்களை திரைப்படங்களின் மூலம் ரசிகர்களிடம் கொண்டு சென்றவர் என்ற பெருமை அவருக்குரியது.

‘கிழக்கே போகும் ரயில்’, ‘சிகப்பு ரோஜாக்கள்’, ‘அலைகள் ஓய்வதில்லை’, ‘முதல் மரியாதை’, ‘கிழக்கு சீமையிலே’, ‘கருத்தம்மா’ உள்ளிட்ட பல வெற்றிப் படைப்புகளை அவர் இயக்கியுள்ளார். மேலும், பல முன்னணி நடிகர்கள் மற்றும் கலைஞர்களை தமிழ் சினிமாவிற்கு அறிமுகப்படுத்தியவராகவும் அறியப்படுகிறார்.

திரைப்படத் துறைக்கான அவரது பங்களிப்பை பாராட்டி இந்திய அரசால் ‘பத்மஸ்ரீ’ விருது வழங்கி கௌரவிக்கப்பட்டதுடன், பல தேசிய மற்றும் மாநில விருதுகளையும் அவர் பெற்றுள்ளார்.

இயக்குநராக மட்டுமன்றி, அண்மைக் காலங்களில் குணச்சித்திர நடிகராகவும் தனது தனித்துவமான நடிப்பால் ரசிகர்களின் பாராட்டைப் பெற்றிருந்தார்.

கடந்த ஆண்டு அவரது மகனும் நடிகருமான மனோஜ் பாரதிராஜா உயிரிழந்த சம்பவம் அவரை மனதளவில் பெரிதும் பாதித்திருந்ததாக நெருங்கிய வட்டாரங்கள் தெரிவித்திருந்தன.

பாரதிராஜாவின் மறைவு தமிழ் திரையுலகிற்கும் இந்திய சினிமாவிற்கும் ஈடுசெய்ய முடியாத இழப்பாகக் கருதப்படுவதுடன், திரையுலக பிரபலங்கள், அரசியல் தலைவர்கள் மற்றும் ரசிகர்கள் பலரும் தங்களது இரங்கல்களைத் தெரிவித்து வருகின்றனர்.

ரீ ரிலீஸாகும் இரு சூப்பர் ஹிட் திரைப்படங்கள்

கே. பாக்யராஜ் மறைவுக்கு தமிழக முதல்வர் விஜய் அஞ்சலி