திடீரென வெடித்த அமெரிக்க KC-135 ரக விமானத்தின் எஞ்சின்!

அமெரிக்காவின் ஜார்ஜியா மாகாணம், அட்லாண்டாவில் உள்ள ஹார்ட்ஸ்ஃபீல்ட்-ஜாக்சன் சர்வதேச விமான நிலையத்தில் (Hartsfield-Jackson Airport), அமெரிக்க விமானப்படைக்குச் சொந்தமான KC-135 ஸ்ட்ரேடோடோங்கர் (Stratotanker) ரக எரிபொருள் நிரப்பும் விமானத்தின் எஞ்சின் புறப்படும் போது  வெடித்துள்ளது.

குறித்த சம்பவத்தின் போது விமானம் ஓடுபாதையிலிருந்து  வானில் எழும்பத் தயாரானபோது, அதன் இடதுபுற எஞ்சின்களில் ஒன்று திடீரென வெடித்தது. இதனால் எஞ்சினில் தீப்பிடித்து கரும்புகை வெளியேறியது.

விமானி உடனடியாக புறப்படுவதைத் தடுத்தல் முறையைப் பயன்படுத்தி விமானத்தை ஓடுபாதையிலேயே பாதுகாப்பாக நிறுத்தினார்.

விமான நிலையத்திலிருந்த ராணுவ மற்றும் சிவில் தீயணைப்பு வாகனங்கள் விரைந்து வந்து, எஞ்சினில் பரவிய தீயை அணைத்தன.

விமானத்தில் இருந்த ஊழியர்கள் மற்றும் விமானப்படை வீரர்கள் அனைவரும் பாதுகாப்பாக வெளியேற்றப்பட்டனர். யாருக்கும் எவ்விதக் காயமும் ஏற்படவில்லை என முதற்கட்டத் தகவல்கள் தெரிவிக்கின்றன.

“KC-135” – பறக்கும் எரிபொருள் நிரப்பும் ரக விமானங்கள் போர் விமானங்களுக்கு நடுவானில் எரிபொருள் நிரப்பப் பயன்படுபவை.