அனைத்து மதத் தலைவர்களும் சிறையில் கௌரவமாக நடத்தப்பட வேண்டும்: டக்ளஸ் தேவானந்தா வலியுறுத்தல்
.jpg)
அனைத்து மதங்களையும் சேர்ந்த தலைவர்கள் சிறைச்சாலைகளில் கௌரவமாகவும் கண்ணியமாகவும் நடத்தப்படுவதைச் சட்டத்தின் ஊடாக உறுதிப்படுத்த வேண்டும் என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா வலியுறுத்தியுள்ளார்.
இது தொடர்பாக ஜனாதிபதி அநுரகுமார திசாநாயக்கவுக்கு அவர் எழுதியுள்ள அவசரக் கடிதத்திலேயே இந்தக் கோரிக்கை முன்வைக்கப்பட்டுள்ளது.
பௌத்த மதத் தலைவர்களில் ஒருவரான கலகொட அத்தே ஞானசார தேரரின் சிறைத்தண்டனை மீண்டும் உறுதிப்படுத்தப்பட்ட நிலையில், சிறைச்சாலை நடைமுறைகளுக்கு அமைவாக அவருக்கு ஆடைகள் வழங்கப்பட்ட விவகாரம் நாட்டில் பேசுபொருளாக மாறியுள்ளதாக டக்ளஸ் தேவானந்தா தனது கடிதத்தில் குறிப்பிட்டுள்ளார்.
இந்த விவகாரம் தொடர்பில் பௌத்த மத பீடங்களும் கரிசனை காட்டி வரும் நிலையில், பிரச்சினையைச் சுமூகமாகத் தீர்ப்பதற்கு அரசாங்கம் விரைவான நடவடிக்கைகளை முன்னெடுத்து வருவதை அவதானிக்க முடிவதாகவும் அவர் தெரிவித்துள்ளார்.
குறுகிய அரசியல் நலன்களுக்காக இந்த விவகாரம் பயன்படுத்தப்பட்டு, நாட்டில் தேவையற்ற அசௌகரியங்கள் ஏற்படுவதைத் தவிர்க்கும் வகையில் அரசாங்கம் முன்னெடுக்கும் நடவடிக்கைகளுக்குத் தனது பாராட்டுகளையும் அவர் தெரிவித்துள்ளார்.
அதேவேளை, இந்த விவகாரத்துக்கு சட்டத் திருத்தங்கள் மூலம் நிரந்தரத் தீர்வு காணப்படும் போது, சிறைகளில் அடைக்கப்படும் ஏனைய மதத் தலைவர்களும் கௌரவமாகவும் கண்ணியமாகவும் நடத்தப்படுவதற்கான ஏற்பாடுகள் சட்டத்தில் தெளிவாக உள்ளடக்கப்பட வேண்டும் என அவர் வலியுறுத்தியுள்ளார்.
1980களில் வெலிக்கடை மற்றும் மட்டக்களப்பு சிறைச்சாலைகளில் தாம் இருந்த காலத்தில், சக கைதிகளாக இருந்த மதத் தலைவர்கள் அநாகரிகமாக நடத்தப்படுவதைக் கண்டு வேதனையடைந்த தருணங்கள் நினைவுக்கு வருவதாகவும் அவர் கடிதத்தில் குறிப்பிட்டுள்ளார்.
பின்னர் நாடாளுமன்ற உறுப்பினராகவும் அமைச்சராகவும் பணியாற்றிய காலத்தில், சிறைகளில் தடுத்து வைக்கப்பட்டிருந்த இந்து, கிறிஸ்தவ மற்றும் இஸ்லாமிய மதத் தலைவர்கள் தாங்கள் எதிர்கொண்ட அசௌகரியங்களைத் தமக்குக் கடிதங்கள் மூலமும் உறவினர்கள் ஊடாகவும் தெரியப்படுத்தியதாகவும் அவர் தெரிவித்துள்ளார். அவ்வாறான முறைப்பாடுகள் தொடர்பில் சம்பந்தப்பட்ட தரப்பினருடன் தொடர்புகொண்டு தீர்வுகளைப் பெற்றுக்கொடுக்க நடவடிக்கை எடுத்ததாகவும் குறிப்பிட்டுள்ளார்.
தனக்கும் இத்தகைய அனுபவங்கள் இருக்கும் என நம்புவதாக ஜனாதிபதியிடம் தெரிவித்துள்ள டக்ளஸ் தேவானந்தா, தற்போதைய சந்தர்ப்பத்தைப் பயன்படுத்தி அனைத்து மதத் தலைவர்களும் சிறைச்சாலைகளில் கௌரவமாக நடத்தப்படுவதைச் சட்டத்தின் மூலம் உறுதிப்படுத்த வேண்டும் எனக் கேட்டுக்கொண்டுள்ளார்.
பொது அறிவு வினாடி வினா
உங்கள் அறிவை சோதித்துப் பாருங்கள்!
