உருவாகும் புதிய காற்றுச் சுழற்சி; இலங்கைக்கு காத்திருக்கும் ஆபத்து

இலங்கையின் வடக்கு, கிழக்கு உள்ளிட்ட 18 மாவட்டங்களில் எதிர்வரும் நாட்களில் கனமழை முதல் மிகக் கனமழை வரை பெய்யக்கூடும் என யாழ்ப்பாணப் பல்கலைக்கழகத்தின் புவியியல் துறைப் பேராசிரியர் நாகமுத்து பிரதீபராஜா எச்சரித்துள்ளார்.

வங்காள விரிகுடாவில் உருவாகக்கூடிய காற்றுச் சுழற்சி மற்றும் அதனைத் தொடர்ந்து புயல் உருவாகும் சாத்தியம் காரணமாக நாட்டின் பல பகுதிகளில் கனமழை பெய்வதுடன், வெள்ளப்பெருக்கு மற்றும் நிலச்சரிவு அபாயங்களும் ஏற்படக்கூடும் என அவர் தெரிவித்துள்ளார்.

எதிர்வரும் ஒக்டோபர் 20ஆம் திகதி முல்லைத்தீவுக்கு வடகிழக்குத் திசையில், வடக்கு மாகாணத்தை அண்மித்த பகுதியில் தற்காலிக வளிமண்டல கீழடுக்குச் சுழற்சி உருவாகக்கூடும் என எதிர்பார்க்கப்படுகிறது. இதன் காரணமாக நாட்டின் பல பகுதிகளில் தற்போது பெய்துவரும் மழை ஒக்டோபர் 23ஆம் திகதி வரை தொடரக்கூடும் எனக் கணிக்கப்பட்டுள்ளது.

மேலும், ஒக்டோபர் 23ஆம் திகதி மத்திய வங்காள விரிகுடாவில் மற்றுமொரு காற்றுச் சுழற்சி உருவாகக்கூடும் என்றும், அது 26ஆம் திகதியளவில் புயலாக வலுப்பெற வாய்ப்புள்ளதாகவும் பேராசிரியர் குறிப்பிட்டுள்ளார்.

தற்போதைய வானிலை மாதிரிகளின் அடிப்படையில், இந்தப் புயல் ஒக்டோபர் 29ஆம் திகதி இரவு இந்தியாவின் ஆந்திரப் பிரதேச மாநிலம், அனகாபள்ளி மாவட்டத்தின் ராம்பில்லி பகுதிக்கு அருகில் கரையைக் கடக்கக்கூடும் என எதிர்பார்க்கப்படுகிறது. எனினும், புயலின் பாதை மற்றும் தீவிரம் மாற்றமடையலாம் என்பதால் இந்தக் கணிப்பை இறுதியானதாகக் கருத முடியாது.

புயல் இலங்கையை நேரடியாகத் தாக்குவதற்கான வாய்ப்பு குறைவாகக் காணப்பட்டாலும், அதன் மறைமுகத் தாக்கத்தால் ஒக்டோபர் 30ஆம் திகதி வரை நாட்டின் பல பகுதிகளில் பரவலாகக் கனமழை பெய்யக்கூடும் எனத் தெரிவிக்கப்பட்டுள்ளது.

யாழ்ப்பாணம், கிளிநொச்சி, முல்லைத்தீவு, மன்னார், வவுனியா, திருகோணமலை, மட்டக்களப்பு, அம்பாறை, கண்டி, மாத்தளை, நுவரெலியா, இரத்தினபுரி, பதுளை, கொழும்பு, கேகாலை, களுத்துறை, கம்பஹா மற்றும் காலி ஆகிய 18 மாவட்டங்களின் பல பகுதிகளில் மழை அதிகரிக்கக்கூடும் என எதிர்பார்க்கப்படுகிறது. குறிப்பாக வடக்கு, கிழக்கு, மத்திய மற்றும் மேல் மாகாணங்களில் மிகக் கனமழை பெய்வதற்கான சாத்தியம் காணப்படுவதாக அவர் தெரிவித்துள்ளார்.

ஏற்கனவே மத்திய, சப்ரகமுவ மற்றும் ஊவா மாகாணங்களில் தொடர்ச்சியாக மழை பெய்துவரும் நிலையில், ஒக்டோபர் 26ஆம் திகதி முதல் 29ஆம் திகதி வரையான காலப்பகுதியில் மேலும் கனமழை பெய்தால் வெள்ளப்பெருக்கு மற்றும் நிலச்சரிவுகள் ஏற்படக்கூடும் என எச்சரிக்கப்பட்டுள்ளது. இதனால் இந்த மாகாணங்களில் வசிக்கும் மக்கள் அவதானத்துடன் செயற்படுமாறு பேராசிரியர் அறிவுறுத்தியுள்ளார்.

அதேவேளை, ஒக்டோபர் 24ஆம் திகதி முதல் 30ஆம் திகதி வரை வடக்கு மற்றும் கிழக்கு மாகாணங்களில் கனமழை பெய்யக்கூடும் என்பதால் தாழ்நிலப் பகுதிகளில் சிறிய அளவிலான வெள்ளப்பெருக்கு ஏற்பட வாய்ப்புள்ளதாகவும் தெரிவிக்கப்பட்டுள்ளது.

ஒக்டோபர் 25ஆம் திகதி முதல் 30ஆம் திகதி வரை வடக்கு மற்றும் கிழக்கு மாகாணங்களின் கடற்பரப்புகள் மிகவும் கொந்தளிப்பாகக் காணப்படக்கூடும் எனவும் எச்சரிக்கப்பட்டுள்ளது. கடல் அலைகளின் உயரம் அதிகரித்து ஆபத்தான நிலைமைகள் உருவாகலாம் என்பதால், குறித்த காலப்பகுதியில் மீனவர்கள் கடலுக்குச் செல்வதைத் தவிர்க்குமாறு பேராசிரியர் பிரதீபராஜா அறிவுறுத்தியுள்ளார்.

இதற்கிடையில், ஒக்டோபர் 23ஆம் திகதி அரபிக்கடலிலும் காற்றுச் சுழற்சி ஒன்று உருவாகக்கூடும் எனக் கணிக்கப்பட்டுள்ளதுடன், அது வலுப்பெறுவதற்கான சாதகமான சூழல் தற்போது காணப்படவில்லை எனவும் அவர் குறிப்பிட்டுள்ளார்.

அனைத்து மதத் தலைவர்களும் சிறையில் கௌரவமாக நடத்தப்பட வேண்டும்: டக்ளஸ் தேவானந்தா வலியுறுத்தல்

யானை மின்வேலி பாதுகாப்புப் பணியில் மதுபோதையில் இருந்ததாக இருவர் கைது!