செம்மணி புதைகுழிக்கு நீதி கோரிய சிறுவன்: யாழ் முன்பள்ளி விளையாட்டு விழாவில் நெகிழ்ச்சி
.jpg)
யாழ்ப்பாணம், வடமராட்சி கிழக்கு, செம்பியன்பற்று வடக்கில் அமைந்துள்ள சென் பிலிப் நேரிஸ் முன்பள்ளியின் வருடாந்த விளையாட்டு விழா நேற்று (12) சிறப்பாக நடைபெற்றது.
இதன்போது இடம்பெற்ற வினோத உடைப் போட்டியில், செம்மணி புதைகுழி விவகாரத்தை நினைவூட்டும் வகையில் வேடமணிந்து வந்த சிறுவன் பலரது கவனத்தையும் ஈர்த்துள்ளார்.
“காரணமே இல்லாமல், அம்மாவின் மார்பில் பால் அருந்திய நிலையில் என்னைப் பல ஆண்டுகளுக்கு முன்னர் புதைத்துவிட்டார்கள். எனக்கு நீதி கிடைக்குமா?” என்ற வாசகம் எழுதப்பட்ட உடையை அணிந்திருந்த சிறுவன், செம்மணி புதைகுழியில் உயிரிழந்தவர்களுக்கு நீதி வழங்கப்பட வேண்டும் என்ற கோரிக்கையை தனது வேடத்தின் ஊடாக வெளிப்படுத்தியுள்ளார்.
சிறுவனிடம் விருந்தினர்கள், “நீங்கள் யாராக வந்துள்ளீர்கள்?” எனக் கேட்டபோது, “காரணமே இல்லாமல் செம்மணியில் என்னைப் புதைத்தார்கள்” என அவர் பதிலளித்துள்ளார்.
தொடர்ந்து, “எங்கிருந்து, ஏன் இப்போது வந்துள்ளீர்கள்?” எனக் கேட்கப்பட்டபோது, “எனது இறப்புக்கும், என்னைப் போன்று புதைக்கப்பட்டவர்களுக்கும் நீதி கேட்டு செம்மணி புதைகுழியிலிருந்து வந்துள்ளேன். எமக்கான நீதியை இந்த அரசாங்கம் வழங்கும் என என்னுடன் புதைக்கப்பட்ட நண்பர்கள் என்னை அனுப்பி வைத்தார்கள்” என மழலை மொழியில் கூறியுள்ளார்.
சிறுவனின் இந்தப் பதில்கள் அங்கு கூடியிருந்த பார்வையாளர்கள் மற்றும் விருந்தினர்களை நெகிழ்ச்சியடையச் செய்ததுடன், செம்மணி புதைகுழி விவகாரம் தொடர்பான நீதிக்கான கோரிக்கையையும் மீண்டும் கவனத்துக்குக் கொண்டுவந்துள்ளன.
பொது அறிவு வினாடி வினா
உங்கள் அறிவை சோதித்துப் பாருங்கள்!
