பட்டதாரி ஆசிரியர் நியமனம்: நாளைய நேர்முகத் தேர்வுகள் ஒத்திவைப்பு; புதிய திகதிகள் மற்றும் முக்கிய அறிவுறுத்தல்கள் வெளியீடு!

நாடளாவிய ரீதியில் தேசிய மற்றும் மாகாணப் பாடசாலைகளில் நிலவும் ஆசிரியர் வெற்றிடங்களை நிரப்புவதற்காகப் பட்டதாரிகளை ஆட்சேர்ப்பு செய்யும் நேர்முகத் தேர்வுகளில் மாற்றம் செய்யப்பட்டுள்ளதாகக் கல்வி, உயர்கல்வி மற்றும் தொழிற்கல்வி அமைச்சு அறிவித்துள்ளது.
இதன்படி, நாளை (20) அனைத்து மாகாணங்களிலும் நடத்துவதற்குத் திட்டமிடப்பட்டிருந்த நேர்முகத் தேர்வுகள் தவிர்க்க முடியாத காரணங்களால் மாத்திரம் ஒத்திவைக்கப்பட்டுள்ளன.
எனினும், நவம்பர் 21ஆம் திகதி முதல் நடைபெறவுள்ள ஏனைய நேர்முகத் தேர்வுகள் முன்னர் திட்டமிடப்பட்டபடியே நடைபெறும் என அமைச்சின் செயலாளர் நாலக களுவெவ தெரிவித்துள்ளார்.
ஒத்திவைக்கப்பட்ட நேர்முகத் தேர்வுகளுக்கான புதிய திகதிகள் மாகாண அடிப்படையில் அறிவிக்கப்பட்டுள்ளன.
அதன்படி, ஊவா மற்றும் வடமத்திய மாகாணங்களுக்கான நேர்முகத் தேர்வுகள் நவம்பர் 26ஆம் திகதியும், வடக்கு, தென், கிழக்கு மற்றும் சப்ரகமுவ மாகாணங்களுக்கான நேர்முகத் தேர்வுகள் நவம்பர் 28ஆம் திகதியும் நடைபெறவுள்ளன.
மேல் மற்றும் வடமேல் மாகாணங்களுக்கான நேர்முகத் தேர்வுகள் நவம்பர் 29ஆம் திகதியும், மத்திய மாகாணத்திற்கான நேர்முகத் தேர்வு டிசம்பர் முதலாம் திகதியும் நடத்தப்படும் என அறிவிக்கப்பட்டுள்ளது.
இதேவேளை, நேர்முகத் தேர்வுக்கான அழைப்புக் கடிதத்துடன் அனுப்பப்பட்ட அறிவுறுத்தல்களுக்கு அமைய, பாடசாலைகளுக்கான விருப்பத் தெரிவுகளைப் பதிவுசெய்வதற்கான இணையவழி முறைமை கல்வி அமைச்சின் உத்தியோகபூர்வ இணையதளத்தில் ‘Teacher Recruitment Application System’ என்ற பெயரில் நவம்பர் 19ஆம் திகதி முதல் செயல்படுத்தப்பட்டுள்ளது.
இந்த முறைமை நவம்பர் 19ஆம் திகதியுடன் முடிவடையாது எனவும், விண்ணப்பதாரர்கள் தமக்கு ஒதுக்கப்பட்ட நேர்முகத் தேர்வு நடைபெறும் நாளன்று இரவு 8 மணி வரை தகவல்களைப் பதிவுசெய்ய முடியும் எனவும் அமைச்சு தெரிவித்துள்ளது.
மேலும், நேர்முகத் தேர்வுக்குச் செல்லும் நாள் வரை அழைப்புக் கடிதம் கிடைக்காத விண்ணப்பதாரர்கள், 2026.10.30ஆம் திகதி இணையதளத்தில் வெளியிடப்பட்ட பெயர்ப் பட்டியலில் தமது பெயர் இடம்பெற்றுள்ள பக்கத்தின் பிரதியையும், அடையாளத்தை உறுதிப்படுத்தும் ஆவணங்களையும் எடுத்துக்கொண்டு, நேர்முகத் தேர்வு நடைபெறும் வளாகத்திலுள்ள காத்திருப்பு அறைக்கு அன்றைய தினம் காலை வருகை தர வேண்டும்.
அங்கு காலை 8 மணி முதல் இணையவழி முறைமையில் நுழைவதற்கான அனுமதி வழங்க ஏற்பாடுகள் செய்யப்பட்டுள்ளன.
விண்ணப்பதாரர்கள் இணையவழியில் தகவல்களைப் பதிவுசெய்த பின்னர் நேர்முகத் தேர்வு மற்றும் செயல்முறைத் தேர்விலும் பங்கேற்க முடியும். அவ்வாறு பங்கேற்பவர்கள் தேர்வுகளை நிறைவு செய்த பின்னரும் அன்றைய தினம் இரவு 8 மணி வரை காத்திருப்பு அறைக்குச் சென்று பாடசாலை விருப்பத் தெரிவு ஆவணங்களைப் பிரதியெடுத்து கையளிக்க முடியும் என அமைச்சின் செயலாளர் தெரிவித்துள்ளார்.
இந்த மாற்றங்களால் விண்ணப்பதாரர்களுக்கு ஏற்பட்டுள்ள அசௌகரியங்களுக்குக் கல்வி அமைச்சு வருத்தம் தெரிவித்துள்ளது.
பொது அறிவு வினாடி வினா
உங்கள் அறிவை சோதித்துப் பாருங்கள்!