யாழ். பல்கலைக்கழக மாணவர்களிடையே பயங்கர மோதல்! 5 பேர் காயம் – 21 மாணவர்களுக்கு விளக்கமறியல்

யாழ்ப்பாணப் பல்கலைக்கழக முகாமைத்துவ பீடத்தின் இரண்டாம் மற்றும் மூன்றாம் வருட மாணவர்களுக்கு இடையில் ஏற்பட்ட மோதலில் ஐந்து மாணவர்கள் காயமடைந்துள்ளதுடன், 21 மாணவர்கள் கைது செய்யப்பட்டு விளக்கமறியலில் வைக்கப்பட்டுள்ளனர்.
திருநெல்வேலி பகுதியில் கடந்த 19ஆம் திகதி வியாழக்கிழமை இரவு இரு குழுக்களைச் சேர்ந்த மாணவர்களுக்கும் இடையில் இந்த மோதல் இடம்பெற்றுள்ளது.
இதன்போது மாணவர்கள் வீதியில் நின்று மோதலில் ஈடுபட்டதாகவும், மாணவர் ஒருவர் பிளேட்டினால் இரு மாணவர்களை வெட்டிக் காயப்படுத்தியதாகவும் தெரிவிக்கப்படுகிறது.
இந்தச் சம்பவத்தில் வெட்டுக்காயங்களுக்கு உள்ளானவர்கள் உள்ளிட்ட ஐந்து மாணவர்கள் யாழ்ப்பாணம் போதனா வைத்தியசாலையில் அனுமதிக்கப்பட்டு சிகிச்சை பெற்றுள்ளனர்.
சம்பவம் தொடர்பில் விசாரணைகளை முன்னெடுத்த கோப்பாய் பொலிஸார், வெட்டுக்காயங்களை ஏற்படுத்தியதாகக் கூறப்படும் மாணவர் ஒருவரையும், பொது அமைதிக்குப் பங்கம் விளைவிக்கும் வகையில் மோதலில் ஈடுபட்டதாகக் கூறப்படும் இரண்டாம் மற்றும் மூன்றாம் வருட மாணவர்கள் 20 பேரையும் கைது செய்துள்ளனர்.
கைது செய்யப்பட்ட 21 மாணவர்களும் யாழ்ப்பாணம் மேலதிக நீதவான் நீதிமன்றத்தில் முன்னிலைப்படுத்தப்பட்டதைத் தொடர்ந்து, அவர்களை எதிர்வரும் 26ஆம் திகதி வரை விளக்கமறியலில் வைக்க நீதிமன்றம் உத்தரவிட்டுள்ளது.
மோதலில் ஈடுபட்டதாகக் கூறப்படும் ஏனைய மாணவர்களையும் கைது செய்வதற்கான நடவடிக்கைகளை பொலிஸார் முன்னெடுத்து வருகின்றனர்.
பொது அறிவு வினாடி வினா
உங்கள் அறிவை சோதித்துப் பாருங்கள்!