
உடுதும்பறை, நக்கிள்ஸ் மலைத்தொடர் பகுதியில் உள்ள கல் குகையில் 15 வயது சிறுமி ஒருவர் குழந்தையைப் பெற்றெடுத்த சம்பவம் தொடர்பில் கைது செய்யப்பட்ட 23 வயது இளைஞர், 5 இலட்சம் ரூபா சரீரப் பிணையில் விடுவிக்கப்பட்டுள்ளார்.
குறித்த சந்தேகநபர் இன்று (15) தெல்தெனிய நீதவான் நீதிமன்றத்தில் ஆஜர்படுத்தப்பட்டதைத் தொடர்ந்து இந்த உத்தரவு பிறப்பிக்கப்பட்டுள்ளது.
இதேவேளை, சம்பவத்துடன் தொடர்புடையதாகக் கைது செய்யப்பட்ட 36 வயதுடைய மற்றொரு நபர் எதிர்வரும் 20ஆம் திகதி வரை விளக்கமறியலில் வைக்கப்பட்டுள்ளார். இவர் 23 வயது சந்தேகநபரின் உறவினர் எனக் கூறப்படுகிறது.
நக்கிள்ஸ் மலைத்தொடரின் மேற்குச் சரிவுக்கு அருகிலுள்ள வனப்பகுதியில், சுமார் ஐந்து மாதங்களுக்கு முன்னர் காணாமல் போன 15 வயது சிறுமி, இரண்டு மாத பெண் குழந்தையுடன் குகை ஒன்றில் வசித்து வந்த நிலையில் பொலிஸாரால் கண்டுபிடிக்கப்பட்டார்.
சிறுமி காணாமல் போனமை தொடர்பில் குடும்பத்தினர் உடுதும்பறை பொலிஸில் முறைப்பாடு செய்திருந்தனர். இதனடிப்படையில் முன்னெடுக்கப்பட்ட விசாரணைகளின்போது, அப்பகுதியில் உள்ள கடையொன்றில் வழக்கத்தை விட அதிகளவு அரிசி கொள்வனவு செய்துவந்த இளைஞர் ஒருவர் தொடர்பில் பொலிஸாருக்கு சந்தேகம் ஏற்பட்டுள்ளது.
அவரைக் கண்காணித்த பொலிஸார், அவர் சென்ற வனப்பகுதியைத் தொடர்ந்து சென்றபோது, பொலித்தீனால் மூடப்பட்டிருந்த கல் குகைக்குள் சிறுமியையும் குழந்தையையும் கண்டுபிடித்துள்ளனர்.
விசாரணைகளில், சிறுமி குறித்த குகையிலேயே குழந்தையைப் பிரசவித்துள்ளதாகத் தெரியவந்துள்ளது.
இதனைத் தொடர்ந்து சிறுமியும் குழந்தையும் பொலிஸாரின் பாதுகாப்பில் மீட்கப்பட்டு, மேலதிக மருத்துவப் பரிசோதனைகள் மற்றும் சிகிச்சைகளுக்காக கண்டி தேசிய வைத்தியசாலைக்கு அனுப்பி வைக்கப்பட்டனர்.
சம்பவம் தொடர்பான மேலதிக விசாரணைகளை உடுதும்பறை பொலிஸார் முன்னெடுத்து வருகின்றனர்.
பொது அறிவு வினாடி வினா
உங்கள் அறிவை சோதித்துப் பாருங்கள்!