யாழ்ப்பாணம் ஆலயத் திருவிழாவில் அதிர்ச்சி; 100-க்கும் மேற்பட்டோர் கண் பாதிப்புடன் வைத்தியசாலையில்

யாழ்ப்பாணம், பண்டத்தரிப்பு பகுதியில் இடம்பெற்ற ஆலயத் திருவிழாவின்போது அதிகளவில் வெடிகள் மற்றும் அதிக சக்திகொண்ட லேசர் விளக்குகள் பயன்படுத்தப்பட்டதாகவும், இதன் காரணமாக கண்ணில் பாதிப்படைந்த 100-க்கும் மேற்பட்டோர் வைத்தியசாலைகளில் அனுமதிக்கப்பட்டுள்ளதாகவும் தெரிவிக்கப்படுகிறது.

பிரான்பற்று, பண்டத்தரிப்பு பகுதியில் உள்ள ஆலயத்தில் நேற்று இடம்பெற்ற உற்சவத்தின்போது அதிகளவில் வானவேடிக்கை வெடிகள் கொளுத்தப்பட்டதுடன், இசை நிகழ்வின்போது அதிக சக்திகொண்ட லேசர் விளக்குகளும் பயன்படுத்தப்பட்டதாக கூறப்படுகிறது.

இதன் பின்னர் கண்ணில் பாதிப்படைந்த பலர் வைத்தியசாலைகளை நாடியுள்ளனர்.

முதற்கட்ட தகவல்களின் அடிப்படையில் தெல்லிப்பளை ஆதார வைத்தியசாலையில் 46 பேரும், யாழ்ப்பாணம் போதனா வைத்தியசாலையில் 120 பேரும் அனுமதிக்கப்பட்டுள்ளதாக தெரிவிக்கப்படுகிறது.

நோயாளிகளின் எண்ணிக்கை அதிகரித்ததைத் தொடர்ந்து யாழ்ப்பாணம் போதனா வைத்தியசாலையில் விசேட ஏற்பாடுகள் மேற்கொள்ளப்பட்டுள்ளதுடன், ஏனைய வைத்தியசாலைகளில் இருந்தும் வைத்தியர்கள் மற்றும் தாதியர்கள் வரவழைக்கப்பட்டுள்ளதாக கூறப்படுகிறது.

கண்ணில் பாதிப்பு ஏற்பட்டவர்கள் பதற்றமின்றி உடனடியாக வைத்தியசாலையை நாடுமாறு வைத்தியசாலை நிர்வாகம் அறிவுறுத்தியுள்ளது.

வெடுக்குநாறி மலை ஆலய வழிபாடு தொடர்பில் நடைபெற்ற விசேட கலந்துரையாடல்

யாழ்ப்பாணம் ஊர்காவற்றுறை வீதியில் கார் விபத்து; மின்கம்பத்தில் மோதி பலத்த சேதம்