2027 வரவு செலவுத் திட்டம்: பொருளாதாரம் நிலைபெற்றுள்ளதாக ஜனாதிபதி அறிவிப்பு

கடந்த இரண்டு ஆண்டுகளில் நாட்டின் பொருளாதாரத்தை நிலைப்படுத்த முடிந்துள்ளதாகத் தெரிவித்த ஜனாதிபதி அநுர குமார திசாநாயக்க, பொருளாதார வளர்ச்சியைத் துரிதப்படுத்தும் நோக்கில் 2027ஆம் ஆண்டுக்கான வரவு செலவுத் திட்டத்தை முன்வைத்துள்ளார்.
2027ஆம் ஆண்டுக்கான வரவு செலவுத் திட்ட உரையை இன்று (12) பாராளுமன்றத்தில் நிகழ்த்தியபோதே ஜனாதிபதி இதனைத் தெரிவித்துள்ளார். பொருளாதார நிலைப்படுத்தலைத் தொடர்ந்து வளர்ச்சி மற்றும் மாற்றத்தை நோக்கி நாட்டை நகர்த்துவதே இந்த வரவு செலவுத் திட்டத்தின் முக்கிய நோக்கமாகும்.
வறுமையை ஒழித்தல், நீதியான சமூகத்தைக் கட்டியெழுப்புதல், மோசடி மற்றும் ஊழலை இல்லாதொழித்தல், பொருளாதார அபிவிருத்தியைத் துரிதப்படுத்துதல் மற்றும் பொதுமக்களின் நம்பிக்கையை மீளக் கட்டியெழுப்புதல் ஆகியன வரவு செலவுத் திட்டத்தின் பிரதான இலக்குகளாகக் குறிப்பிடப்பட்டுள்ளன.
மத்திய கிழக்குப் போர் நாட்டின் வலுசக்திச் சந்தையில் தாக்கத்தை ஏற்படுத்தியதாகவும், அதனால் மக்களுக்கு நிவாரணம் வழங்குவதற்காக 147 பில்லியன் ரூபா செலவிடப்பட்டதாகவும் ஜனாதிபதி தெரிவித்துள்ளார்.
பொருளாதார முன்னேற்றம் தொடர்பான அறிவிப்புகள்
2025ஆம் ஆண்டில் நாட்டின் நடைமுறைக் கணக்கு வரலாற்றில் மிக உயர்ந்த அளவாக 1,719 மில்லியன் அமெரிக்க டொலர் மிகையைப் பதிவு செய்துள்ளதாக ஜனாதிபதி குறிப்பிட்டுள்ளார்.
இந்த ஆண்டில் 9 பில்லியன் அமெரிக்க டொலர்களுக்கும் அதிகமான வெளிநாட்டுப் பணவனுப்பல்கள் எதிர்பார்க்கப்படுவதாகவும் அவர் தெரிவித்துள்ளார்.
2022ஆம் ஆண்டின் இறுதியில் காணப்பட்ட கடன் நிலைமையை 2025ஆம் ஆண்டின் இறுதியில் 95 சதவீதம் வரை குறைத்துக்கொள்ள முடிந்துள்ளதாகவும் ஜனாதிபதி சுட்டிக்காட்டியுள்ளார்.
அரச வருமானத்தில் வட்டி செலுத்துவதற்காக ஒதுக்கப்பட்ட தொகை 2022ஆம் ஆண்டில் 79.1 சதவீதமாக இருந்த நிலையில், 2025ஆம் ஆண்டில் 45.9 சதவீதமாகவும், 2026 செப்டெம்பர் மாதத்தில் 39.6 சதவீதமாகவும் குறைக்கப்பட்டுள்ளதாகவும் தெரிவிக்கப்பட்டுள்ளது.
மேலும், 2022ஆம் ஆண்டில் 52 அரச தொழில்முயற்சிகள் 744.6 பில்லியன் ரூபா மொத்த வரிக்கு முந்திய நட்டத்தைப் பதிவு செய்திருந்தன. இந்த நிலை 2025ஆம் ஆண்டில் 44.4 பில்லியன் ரூபா இலாபமாக மாற்றப்பட்டுள்ளதாகவும், 2026 ஆகஸ்ட் மாத இறுதியில் அரச நிறுவனங்கள் 367 பில்லியன் ரூபா வரிக்கு முந்திய இலாபத்தைப் பதிவு செய்துள்ளதாகவும் ஜனாதிபதி தெரிவித்துள்ளார்.
2018ஆம் ஆண்டு முதல் 2025ஆம் ஆண்டு வரையிலான காலப்பகுதியில் ஸ்ரீலங்கன் எயார்லைன்ஸ் நிறுவனத்தின் திரண்ட நட்டம் 528 பில்லியன் ரூபாவாகக் காணப்படுவதாகவும், இதற்குத் தீர்வு காண அமைச்சரவைக் குழுவொன்று நியமிக்கப்பட்டுள்ளதாகவும் அவர் குறிப்பிட்டுள்ளார்.
இலங்கையின் இறையாண்மைக் கடன் தரப்படுத்தலை Fitch Ratings நிறுவனம் உயர்த்தியுள்ளதுடன், Transparency International நிறுவனத்தின் ஊழல் தொடர்பான தரப்படுத்தல்களிலும் முன்னேற்றம் ஏற்பட்டுள்ளதாக ஜனாதிபதி தெரிவித்துள்ளார்.
முதலீடு மற்றும் ஏற்றுமதியை ஊக்குவிக்கும் திட்டங்கள்
2027ஆம் ஆண்டில் அரச முதலீட்டை மொத்த தேசிய உற்பத்தியில் 14 சதவீதமாக உயர்த்த இலக்கு நிர்ணயிக்கப்பட்டுள்ளது. இதற்காக 2,000 பில்லியன் ரூபா மூலதனச் செலவுகளுக்கு ஒதுக்கப்பட்டுள்ளது.
அரச – தனியார் பங்காண்மைச் சட்டமூலம் அடுத்த ஆண்டின் ஆரம்பத்தில் கொண்டுவரப்படவுள்ளதாகவும், முதலீட்டுப் பாதுகாப்புச் சட்டமூலம் சட்டமா அதிபரின் அனுமதிக்காகச் சமர்ப்பிக்கப்பட்டுள்ளதாகவும் ஜனாதிபதி அறிவித்துள்ளார்.
தேசிய புள்ளிவிபரவியல் சட்டம் வரையப்பட்டு வருவதுடன், 2027ஆம் ஆண்டின் ஆரம்பத்தில் சுங்கக் கட்டளைச் சட்டம் திருத்தப்படவுள்ளது. பழைய தொழிலாளர் சட்டத்தையும் திருத்தி புதிய பரிந்துரைகளை முன்வைக்க நடவடிக்கை எடுக்கப்படும் எனவும் தெரிவிக்கப்பட்டுள்ளது.
கொழும்புக்கு வெளியேயும் முதலீடுகளை ஊக்குவிக்கும் வகையில் விசேட முதலீட்டு வலயங்கள் அடையாளம் காணப்பட்டு, அதற்கான நிவாரணப் பொதியொன்றும் அறிமுகப்படுத்தப்படவுள்ளது. முதலீட்டு ஊக்குவிப்புக்காகப் புதிய விசேட நிறுவனமொன்றை நிறுவவும் திட்டமிடப்பட்டுள்ளது.
தேசிய ஒற்றை முதலீட்டுச் சாளரத்தை உருவாக்குவதற்கான ஆலோசனை நிறுவனத்தைத் தெரிவுசெய்ய விலைமனுக்கள் கோரப்பட்டுள்ளதுடன், இதற்காக 100 மில்லியன் ரூபா ஒதுக்கப்பட்டுள்ளது.
சீனாவுடன் புதிய சுதந்திர வர்த்தக ஒப்பந்தத்தில் கைச்சாத்திடுவது குறித்தும் கவனம் செலுத்தப்பட்டுள்ளதாக ஜனாதிபதி தெரிவித்துள்ளார். இலங்கை – ஐரோப்பிய பொருளாதார ஒத்துழைப்புக்காக 3,430 மில்லியன் ரூபா ஒதுக்கப்பட்டுள்ளது.
மேலும், தனியார் துறையில் டிஜிட்டல் புத்தாக்க நிறுவனங்கள் மற்றும் புதிய டிஜிட்டல் தொழில்முயற்சிகளுக்கு நிதியுதவி வழங்க 10 பில்லியன் ரூபா ஒதுக்கப்படவுள்ளது. 2027ஆம் ஆண்டில் டிஜிட்டல் மயமாக்கல் நடவடிக்கைகளுக்காக மொத்தம் 28.5 பில்லியன் ரூபா ஒதுக்கப்பட்டுள்ளது.
நுண்நிதி முகாமைத்துவ அதிகாரசபை 2027ஆம் ஆண்டில் நிறுவப்படவுள்ளதாகவும், சூதாட்டத் துறையை ஒழுங்குபடுத்துவதற்கான சட்ட நிபந்தனைகள் கொண்டுவரப்படும் எனவும் ஜனாதிபதி மேலும் தெரிவித்துள்ளார்.
பொது அறிவு வினாடி வினா
உங்கள் அறிவை சோதித்துப் பாருங்கள்!