2026 உலகக்கிண்ண கால்பந்து: செக் குடியரசை வீழ்த்தி தென்கொரியா த்ரில் வெற்றி

2026 உலகக்கிண்ண கால்பந்து தொடரின் 2ஆவது லீக் போட்டியில் தென்கொரியா அணி 2-1 என்ற கோல் கணக்கில் செக் குடியரசை வீழ்த்தி சிறப்பான வெற்றியை பதிவு செய்துள்ளது.

இரு அணிகளுக்கும் இடையிலான இந்த பரபரப்பான ஆட்டத்தின் முதல் பாதியில் எந்த அணியாலும் கோல் அடிக்க முடியாததால் 0-0 என்ற சமநிலையில் முடிவடைந்தது.

தொடர்ந்து நடைபெற்ற இரண்டாம் பாதியில் 59ஆவது நிமிடத்தில் செக் குடியரசின் லாடிஸ்லாவ் க்ரெஜ்ஸி கோல் அடித்து தனது அணியை 1-0 என்ற முன்னிலைக்கு கொண்டு சென்றார்.

பின்னடைவை சந்தித்த தென்கொரியா அணி அதிரடியாக மீண்டு வந்து தாக்குதல் ஆட்டத்தை வெளிப்படுத்தியது. இதன் பலனாக 67ஆவது நிமிடத்தில் ஹ்வாங் இன்-போம் கோல் அடித்து போட்டியை 1-1 என சமநிலைப்படுத்தினார்.

இதையடுத்து வெற்றிக்கான முனைப்புடன் விளையாடிய தென்கொரியா அணிக்கு 80ஆவது நிமிடத்தில் ஓ ஹியான்-கியூ கோல் அடித்து முன்னிலை பெற்றுத் தந்தார்.

போட்டியின் இறுதி வரை அந்த முன்னிலையை தக்கவைத்துக் கொண்ட தென்கொரியா, 2-1 என்ற கோல் கணக்கில் செக் குடியரசை வீழ்த்தி தொடரில் முக்கியமான வெற்றியைப் பதிவு செய்தது.